Aktori Laert Vasili ka folur i prekur për videot intime që u janë shpërndarë disa artisteve të njohura në vend. Videot, sipas lajmit, janë xhiruar nga kompozitori Adrian Hila.
Vasili tha se një pjesë e grave që shfaqen në video i njeh nga afër dhe ka punuar me to. Sipas tij, do të jepte edhe jetën, nëse do të ishte e nevojshme, për t’ua shmangur traumën që kanë kaluar këto ditë.
“Po t’ia bënin gruas tënde, vajzës tënde? Është tmerr i madh. Po të kisha mundësi të ndaloja kohën dhe ta ktheja pas, do ta kisha dhënë jetën time dhe do thoja kalojeni këtë”, u shpreh ai.
Aktori theksoi se kur preken artistët, që me vetëmohim shpirtëror përpiqen të sjellin diçka drejt së bukurës, shtrohet një pyetje e madhe: a jemi popull trim, apo jemi popull që do të përçudnojë edhe ato pak vlera që ka. Fjalët i tha përballë gazetares Grida Duma.
Gazetarja ka thënë se shqiptarët janë një popull i sëmurë që ka nevojë për shërim.
Videot u publikuan dhe u shpërndanë fillimisht në faqe për të rritur, e më pas në rrjetet sociale. Policia nisi hetimet, ndërsa kompozitori tashmë po hetohet në gjendje të lirë, pasi i ka xhiruar personat që vinin në ambientin në fjalë pa dijeninë e tyre.
