Një postim i vjetër i Aurelës Gaçe për kompozitorin Adrian Hila po rikthehet në vëmendje, pas zhvillimeve të fundit rreth emrit të tij.
Në një publikim të bërë në Facebook më 21 qershor 2014, këngëtarja kishte ndarë një fotografi me Adi Hilën dhe kishte shkruar një mesazh të gjatë mirënjohjeje për bashkëpunimin e tyre artistik.
Në postimin e saj, Aurela Gaçe shkruante:
“Me Adi Hilën, njeriun që ka shkruar për mua ‘Nata’, ‘Jetoj’, ‘S’jam Tribu’, ‘Ja ke nge’, ‘Ku po shkon kjo botë’, ‘Cimica’, ‘E pafajshme jam’, ‘Shpirti i shpirtit tim’ e shumë të tjera. Adi Hila, ti më ke dhënë shpirtin tënd në këto këngë, e unë të falënderoj që m’i besove mua. Je edhe miku e vëllai im.”
Mesazhi i këngëtares ishte një vlerësim publik për rolin që Adi Hila kishte pasur në krijimtarinë e saj muzikore, duke përmendur disa prej këngëve me të cilat ata kishin bashkëpunuar.
Ky postim është bërë më 21 qershor 2014, shumë vite përpara zhvillimeve që kanë rikthyer sot në vëmendje emrin e kompozitorit. Bashkëpunimi mes tyre është dokumentuar edhe në materiale të kohës; për shembull, kënga “Shpirt i shpirtit tim” ishte kompozuar dhe orkestruar nga Adrian Hila.
Ndërkohë, pas aludimeve të fundit që kanë qarkulluar online, Gaçe ka reaguar publikisht duke mohuar përfshirjen në çdo video të natyrës së përfolur dhe duke theksuar se marrëdhëniet e saj me autorët muzikorë kanë qenë profesionale.
