Publikimi i videove intime që kanë qarkulluar ditët e fundit ka sjellë në fokus edhe përgjegjësinë penale që mund të lindë në rast se një person është filmuar pa dijeninë dhe pëlqimin e tij.
Policia e Tiranës ka referuar materialet në Prokurori dhe ka bërë të ditur se po hetohen, ndër të tjera, veprat penale “Ndërhyrja e padrejtë në jetën private”, “Përgjimi i paligjshëm i të dhënave kompjuterike”, “Ndërhyrja në të dhënat kompjuterike” dhe “Keqpërdorimi i pajisjeve”. Po ashtu, Krimi Kibernetik po punon për identifikimin e adresave IP dhe profileve që kanë publikuar apo shpërndarë materialet.
Në këtë pikë, një dallim juridik është veçanërisht i rëndësishëm: pëlqimi për një marrëdhënie intime nuk do të thotë automatikisht pëlqim për t’u filmuar.
Nëse gjatë hetimit do të provohej se një person ka qenë dakord për marrëdhënien, por nuk ka dhënë pëlqim që ajo të regjistrohej, ligji parashikon përgjegjësi për regjistrimin e pamjeve të jetës private pa pëlqim.
Çfarë parashikon Neni 121?
Neni 121 i Kodit Penal, “Ndërhyrje të padrejta në jetën private”, parashikon gjobë ose burgim deri në 2 vjet për regjistrimin apo ruajtjen për publikim të të dhënave që ekspozojnë jetën private të një personi pa pëlqimin e tij.
Ndërsa shpërndarja, ofrimi për publikim apo publikimi i materialeve të marra në këtë mënyrë dënohet me burgim deri në 3 vjet.
Kështu, hetimi duhet të përcaktojë qartë kush i ka vendosur kamerat, nëse personat e filmuar kanë qenë në dijeni, kush i ka ruajtur materialet dhe kush i ka publikuar apo shpërndarë më pas.
Deri në këtë fazë, nuk mund të thuhet se Adi Hila do të dënohet me një numër të caktuar vitesh. Përgjegjësia penale do të varet nga provat dhe nga roli konkret që do të provohet se ka pasur secili person.
Pra, nëse provohet filmimi pa pëlqim, ligji parashikon deri në 2 vite burg; ndërsa për publikimin ose shpërndarjen e materialeve të marra në këtë mënyrë, deri në 3 vite burg.
Çdo person konsiderohet i pafajshëm derisa fajësia të provohet me vendim gjyqësor të formës së prerë.
