Monika Lubonja ka bërë publik kallëzimin penal që ka depozituar ndaj kompozitorit Adi Hila, pas shpërndarjes në rrjet të videove int*ime. Dokumenti u nda prej saj përmes një postimi në Instagram.
Në kallëzim, Lubonja e denoncon Hilën për dy vepra: fyerje dhe ndërhyrje të padrejtë në jetën private. Në të njëjtin postim, ajo ka theksuar sërish se nuk ishte në dijeni që po filmohej.
Nga deklarata te kallëzimi
Ky hap vjen pas reagimit të saj të parë publik, ku Lubonja deklaroi se nuk kishte dhënë pëlqimin për t’u filmuar apo regjistruar, dhe as që materialet int*ime të shpërndaheshin, të shiteshin ose të publikoheshin. “Kam dashur dikë dhe kam besuar. Nuk turpërohem për dashurinë që kam dhënë”, shkruante ajo atëherë, duke shtuar se e dhemb fakti që besimi i saj u kthye në armë kundër saj.
Në atë deklaratë, ajo kishte paralajmëruar gjithashtu se i ishte drejtuar drejtësisë dhe se do ta ndiqte çështjen ligjërisht deri në fund. Publikimi i kallëzimit tregon tani konkretisht se për çfarë e akuzon ajo kompozitorin.
Lubonja u ka kërkuar mediave të respektojnë privatësinë e saj dhe të mos publikojnë apo spekulojnë me materialet int*ime, ndërsa opinionit publik i ka kërkuar të mos e kthejë dhimbjen e saj në argëtim.
Çfarë ndodh më tej
Çështja tashmë kalon në duart e organeve të drejtësisë, të cilat do të vlerësojnë kallëzimin e paraqitur nga Lubonja. Ajo ka thënë se është e bindur që e vërteta do të dalë në dritë dhe se pret që drejtësia të bëjë punën e saj.
Në reagimin e saj të mëparshëm, Lubonja kishte kërkuar gjithashtu që të ndalej baltosja e saj në emër të një “morali kolektiv”, duke theksuar se dinjiteti i një njeriu ndërtohet gjatë gjithë jetës dhe nuk mund të zbehet nga tradhtia e dikujt.
