Kryeministri Edi Rama u ka dërguar një mesazh të qartë protestuesve që në këto momente ndodhen nën zyrën e tij në bulevardin qendror të Tiranës, duke treguar se ndodhet në Porto Montenegro, një nga perlat turistike të vendit të vogël ballkanik me biznesmenin kanadez që e transformoi.
Edhe më herët, kryeministri e ka pohuar publikisht se në vitin 2006 ka ardhur në Shqipëri miliarderi famëmadh kanadez Peter Munk, me idenë e ndërtimit të një marine në Durrës, pikërisht aty ku ndërton sot Muhamed Alabar, por është përzënë.
Tani, Edi Rama tregon se ndodhet në Porto Montenegro me një nga pasuesit e familjes Munk, i cili po shpjegon investimin miliarda dollarë dhe transformimin që Porto Montenegro i ka sjellë vendit të vogël ballkanik.
Përmes kësaj shfaqje live në një kohë që protestuesit nën zyrën e tij protestojnë kundër projektit amerikan për Zvërnecin, Edi Rama u dërgon një mesazh të prerë të gjithë qytetarëve, se projekti që synon ta ngjisë Shqipërinë në krye të listës së turizmit, nuk ka shance të ndalet.
“O çuna goca na e kaluan njëherë këta vëllezërit e vegjël topin për shalësh, për fajin e honxhobonxhove tanë që e lanë topin ta marrë deti. Po tani s’bëhet llaf më, ta harrojnë të gjithë ata që thonë s’duan apo s’na duan, se na kalon prap huq topi i historisë së Shqipërisë së Re Europiane”, shkruan Edi Rama dhe ndan bashkëbisedimin me një nga drejtuesit e Porto Montenegro.
