Mbrëmja e sotme pritet të mbajë të mbërthyer pas ekranit një pjesë të madhe të publikut shqiptar, pasi formati “Ferma VIP” ka paralajmëruar një spektakël të jashtëzakonshëm.
Pas një jave mjaft të tensionuar, të mbushur me incidente të rënda dhe debate të forta (përfshirë rastin e Olës), kurioziteti i audiencës për të parë se çfarë vendimesh do të merren është në kulmin e tij.
Megjithatë, duket se televizioni “Top Channel” nuk ka ndërmend t’ia lërë të gjithë vëmendjen dhe monopolin e shikueshmërisë formatit rival. Në një lëvizje të mirëmenduar strategjike, ata kanë zgjedhur pikërisht mbrëmjen e sotme për të tërhequr një pjesë të mirë të audiencës.
Përmes një postimi zyrtar në rrjetet sociale, është njoftuar se emisioni “Goca dhe Gra” do të transmetojë sot në orën 21:00 (në të njëjtin orar me nisjen e Prime-it të Fermës) intervistën e Brikena Selmanit.
Ish banorja e edicionit të pestë të “Big Brother VIP”, e cila qëndroi e izoluar për plot 113 ditë, vjen për të rrëfyer gjithë emocionet dhe zhurmën e rrugëtimit të saj.
Kjo përballje “kokë më kokë” mes dramave të papritura të “Ferma VIP” dhe intervistës ekskluzive të ish-konkurrentes së BBV5 tregon qartë “luftën” e vazhdueshme për audiencë mes televizioneve, duke e vendosur publikun para një zgjedhjeje të vështirë për mbrëmjen e sotme.
