Shtatë persona kanë humbur jetën në Francë, ndërsa një valë e fortë të nxehti po sjell temperatura rekord në mbarë Europën.
Pesë persona janë mbytur në liqene, lumenj ose pranë plazheve gjatë fundjavës, teksa Franca po përballet me temperatura përvëluese, deklaroi të martën ministrja e deleguar për Energjinë, Maud Bregeon.
Autoritetet meteorologjike kanë lëshuar alarme për mot ekstrem, pasi një vrapues 53-vjeçar pësoi arrest kardiak dhe humbi jetën gjatë një gare në Paris të dielën, ndërsa një grua ndërroi jetë nga goditja e të nxehtit gjatë një aktiviteti sportiv në Lyon.
Ministrja franceze e Sportit, Marina Ferrari, paralajmëroi se disa gara sportive mund të anulohen në ditët në vijim për shkak të temperaturave të larta. Ajo u bëri thirrje organizatorëve të forcojnë masat mjekësore dhe të sigurojnë ujë të mjaftueshëm për pjesëmarrësit.
Franca dhe Mbretëria e Bashkuar kanë regjistruar temperatura rekord për muajin maj gjatë fundjavës. Në Paris u shënua dita e parë e këtij viti me temperatura mbi 30 gradë Celsius, ndërsa në Britani u regjistrua një rekord i ri prej 34.8°C.
Sipas shërbimeve meteorologjike, temperaturat në jugperëndim të Francës mund të arrijnë deri në 40°C të premten, ndërsa rajoni i Brittany në veriperëndim po përgatitet për temperatura deri në 36°C.
Agjencia meteorologjike franceze ka shpallur alarm portokalli për veriperëndimin e vendit dhe alarm të verdhë për stuhi të mundshme në pjesën qendrore dhe perëndimore.
Edhe Italia po përballet me temperatura ekstreme, ku në disa rajone janë vendosur kufizime për punën në ambiente të hapura. Alarme portokalli janë lëshuar për rreth një duzinë qytetesh, sidomos për grupet më të rrezikuara.
Në Gjermani, temperaturat kaluan 30°C për herë të parë këtë vit dhe meteorologët paralajmërojnë se i nxehti do të vijojë të intensifikohet gjatë javës.
Ekspertët e lidhin këtë valë ekstreme të të nxehtit me fenomenin e njohur si “kupola e nxehtësisë” (“heat dome”), një dukuri atmosferike që po fuqizohet nga ndryshimet klimatike të shkaktuara nga aktiviteti njerëzor.
