Një ngjarje e rëndë ka tronditur opinionin publik, ku një fëmijë vetëm 4 vjeç ka ndërruar jetë në spitalin e Tiranës, pas disa ditësh në gjendje kritike për jetën.
Sipas informacioneve, ngjarja ka ndodhur tre ditë më parë në Pogradec, ku i mituri është goditur aksidentalisht në kokë me një gur nga motra e tij, teksa po luanin në banesë. Menjëherë pas incidentit, ai është transportuar me urgjencë në spitalin e Pogradecit për ndihmë mjekësore.
Për shkak të gjendjes së rënduar shëndetësore, mjekët kanë vendosur transferimin e tij në spitalin e Traumës në Tiranë, ku i është nënshtruar trajtimit më të specializuar. Megjithatë, pavarësisht përpjekjeve të stafit mjekësor, 4-vjeçari nuk ka mundur t’i mbijetojë plagëve të marra.
Ngjarja ka shkaktuar dhimbje të madhe te familjarët dhe ka rikthyer vëmendjen te kujdesi i shtuar që duhet treguar ndaj fëmijëve, sidomos gjatë lojërave brenda ambienteve të shtëpisë.
Autoritetet pritet të sqarojnë më tej rrethanat e plota të kësaj ngjarjeje tragjike.
