Aktori amerikan Eric Dane, i njohur për rolet e tij në serialet e suksesshme Grey’s Anatomy dhe Euphoria, ka ndërruar jetë të enjten në moshën 53-vjeçare, kanë bërë të ditur përfaqësuesit e tij.
Dane u bë i famshëm në mesin e viteve 2000 me rolin e Dr. Mark Sloan, i njohur si “McSteamy”, në dramën mjekësore të rrjetit televiziv American Broadcasting Company (ABC). Ai ishte pjesë e serialit nga viti 2006 deri në vitin 2012, ndërsa u rikthye për një paraqitje të shkurtër në vitin 2021.
Edhe pse personazhi i tij u vra pas një rrëzimi avioni, ai mbeti ndër figurat më të dashura të serialit, aq sa spitali mori emrin Grey Sloan Memorial në nder të tij dhe personazhit të Lexie Grey.
Në prill të vitit të kaluar, aktori njoftoi se ishte diagnostikuar me ALS (skleroza laterale amiotrofike), një sëmundje progresive që prek qelizat nervore që kontrollojnë lëvizjen e muskujve.
Pas diagnozës, Dane u angazhua publikisht për rritjen e ndërgjegjësimit mbi këtë sëmundje, duke folur në një konferencë shtypi në Uashington për sfidat me të cilat përballen pacientët me ALS.
Në shtator, ai u nderua me çmimin “Avokati i Vitit” nga ALS Network, në vlerësim të përkushtimit të tij për mbështetjen e komunitetit të prekur nga kjo sëmundje.
I lindur më 9 nëntor 1972 dhe i rritur në Kaliforninë Veriore, Eric Dane përjetoi humbjen e babait në moshë të hershme. Me një karrierë të gjatë në televizion dhe film, ai la pas një trashëgimi të rëndësishme artistike dhe një bazë të gjerë fansash në mbarë botën.
