Oficerë pensionistë grekë në malet e Përmetit, Këlcyrës dhe Tepelenës? Historiani Arben Llalla ngre pretendime dhe publikon video
Historiani Arben Llalla ka ngritur një pretendim që ka ngjallur reagime në rrjetet sociale, duke deklaruar se një grup oficerësh pensionistë nga Greqia janë parë në zonat malore të Përmetit, Këlcyrës dhe Tepelenës.
Sipas Llallës, këta persona kanë zhvilluar aktivitete në brezin kufitar, ndërsa në një postim të bërë publik ai pretendon se janë kryer edhe filmime të zonave pranë kufirit. Për të mbështetur deklaratat e tij, historiani ka publikuar edhe një video, ku sipas tij shfaqen pamje nga aktiviteti i grupit në fjalë.
Postimi ka tërhequr vëmendjen e shumë ndjekësve dhe ka nxitur diskutime të shumta në rrjetet sociale, ku një pjesë e komentuesve kërkojnë sqarime të mëtejshme mbi qëllimin e këtyre vizitave, ndërsa të tjerë shprehen skeptikë ndaj pretendimeve të ngritura.
Deri në këto momente nuk ka një reagim zyrtar nga institucionet shqiptare lidhur me pretendimet e bëra publike nga Arben Llalla. Ndërkohë, videoja e publikuar prej tij vijon të qarkullojë në rrjet, duke ngjallur interes dhe debat mes qytetarëve.
