Protesta kundër projektit turistik në Zvërnec ka kaluar kufijtë e Shqipërisë, duke tërhequr vëmendjen e mediave ndërkombëtare. Në një artikull të publikuar së fundmi, media të huaja raportojnë se mijëra qytetarë u mblodhën në Tiranë nën sloganin “Shqipëria nuk është në shitje”, për të kundërshtuar projektin e lidhur me investimet e Jared Kushner dhe Ivanka Trump.
Sipas raportimeve, protestuesit marshuan në rrugët e kryeqytetit me flamuj dhe pankarta, duke shprehur shqetësimin për ndikimin që mund të ketë zhvillimi i projektit në bregdet dhe në zonat e mbrojtura natyrore të vendit.
Artikulli thekson se projekti ka hapur debat të fortë në Shqipëri mes atyre që e shohin si mundësi për zhvillim ekonomik, vende të reja pune dhe rritje të turizmit, dhe kritikëve që paralajmërojnë për rrezikun ndaj mjedisit dhe trashëgimisë natyrore.
Pamjet nga protesta në Tiranë janë shpërndarë gjerësisht në rrjetet sociale, ndërsa mediat e huaja e cilësojnë atë si një nga reagimet më të forta qytetare ndaj një projekti investimi të viteve të fundit.
