Një reagim i fortë ka ardhur në rrjetet sociale pas raportimeve për djegien e makinës së gazetarit Sami Curri. Në një postim publik, Klodiana Lala e cilësoi ngjarjen si një sulm të drejtpërdrejtë ndaj fjalës së lirë dhe një përpjekje për të heshtur të vërtetën.
“Aktoritetet duhet të hedhin dritë mbi këtë ngjarje, ndryshe do të jenë bashkëfajtore,” – shkruan ajo, duke ngritur shqetësimin për mungesën e reagimit institucional.
Postimi ka ngjallur reagime të shumta nga ndjekësit, ku nuk kanë munguar as komentet ironike dhe përplasjet verbale. Një prej komentuesve tenton të minimizojë situatën, ndërsa vetë gazetarja i përgjigjet me tone të ashpra, duke theksuar se nuk trembet nga kërcënimet.
Ndërkohë, qytetarë të tjerë kanë shprehur mbështetje për Lalën, duke kërkuar më shumë transparencë dhe drejtësi, ndërsa disa kanë ngritur akuza të forta për gjendjen e rendit dhe ndikimin e krimit në vend.
Ngjarja ka rikthyer në vëmendje debatin mbi sigurinë e gazetarëve në Shqipëri dhe nevojën për reagim të menjëhershëm nga institucionet për të garantuar lirinë e medias.
