Ministria e Jashtme ka paralajmëruar se persona të paidentifikuar kanë krijuar një faqe të rreme në internet, e cila paraqitet si platformë për aplikimin e vizave shqiptare, duke rrezikuar mashtrimin e qytetarëve të huaj që duan të hyjnë në Shqipëri.
Sipas njoftimit zyrtar, faqja në fjalë imiton përmbajtjen dhe pamjen e platformës zyrtare të aplikimit për vizë, duke publikuar informacione dhe materiale të ngjashme me ato institucionale. Megjithatë, autoritetet theksojnë se kjo faqe nuk është e autorizuar dhe nuk ka asnjë lidhje me institucionet shtetërore shqiptare.
Ministria u bën thirrje të gjithë të interesuarve që të tregojnë kujdes dhe të përdorin vetëm faqet dhe kanalet zyrtare për aplikime dhe informacione, në mënyrë që të shmangin mashtrimet apo abuzimet e mundshme.
Ndërkohë, strukturat e sigurisë kibernetike dhe organet ligjzbatuese kanë nisur verifikimet dhe po marrin masa për bllokimin e aktivitetit të paligjshëm, si dhe për identifikimin e personave përgjegjës.
