Një deklaratë e papritur e Mirit brenda shtëpisë së “Big Brother VIP Albania” ka ndezur polemika dhe ka sjellë një reagim të menjëhershëm nga familjarët e Selinës.
Marrëdhënia mes dy banorëve, e cila kohët e fundit është ftohur, mori një tjetër kthesë pasi Miri ngriti publikisht dyshime mbi qëndrimin e saj. Gjatë një bisede me Juelën, ai u shpreh se Selina nuk e ka pyetur asnjëherë për raportin që ai ka me bashkëshorten jashtë shtëpisë. Po ashtu, ai komentoi edhe afrimitetin e saj me Gimbon, duke thënë se nuk e sheh më “si më parë” dhe duke lënë të kuptohet se ajo mund të ketë pasur ndjenja për të.
Madje, Miri paralajmëroi se do ta përballej drejtpërdrejt me këtë pyetje, ndërsa shtoi edhe dyshime të tjera në biseda me banorët.
Deklaratat e tij nuk janë pritur mirë nga familja e Selinës, e cila menaxhon llogarinë e saj në Instagram. Përmes një reagimi zyrtar, ata e kanë cilësuar situatën si të papranueshme, duke kritikuar faktin që një burrë i martuar, sipas tyre, po përpiqet të krijojë një narrativë të pavërtetë për një vajzë më të re në moshë.
Familjarët mohojnë kategorikisht çdo aludim për pëlqim apo ndjenja nga ana e Selinës, duke theksuar se mes tyre ka ekzistuar vetëm një raport korrekt loje, pa flirt apo sinjale të dykuptimta.
Në fund të reagimit, ata lënë të kuptohet se e konsiderojnë çështjen të mbyllur, duke theksuar se publiku është ai që gjykon dhe kupton situatën.
