Një ditë pasi u shkarkua nga posti i ministres së Jashtme nga kryeministri Edi Rama, Elisa Spiropali ka reaguar publikisht duke theksuar se përfundimi i një mandati nuk do të thotë përfundim i angazhimit të saj politik dhe publik.
Në një postim të gjatë në rrjetet sociale, ajo shprehet se politika është një hapësirë dinamike, ku vlerësimi i kontributeve bëhet me kohën dhe jo vetëm përmes posteve të mbajtura. Sipas saj, ajo që mbetet e rëndësishme është mënyra se si është ushtruar përgjegjësia dhe pesha që i është dhënë qëndrimit publik.
Spiropali thekson se shërbimi ndaj Shqipërisë ka qenë një zgjedhje e vetëdijshme dhe e lidhur me dashurinë për vendin, duke e konsideruar jo si një “aksident karriere”, por si një akt besimi në orientimin dhe zhvillimin e shtetit. Në mesazhin e saj, ajo përmend edhe rrugëtimin historik të Shqipërisë drejt integrimit euroatlantik, nga aspiratat e rilindasve te anëtarësimi në NATO dhe procesi i integrimit në Bashkimin Europian.
Në përfundim të postimit, ajo nënvizon se projekti kombëtar mbetet i lidhur me ndërtimin e një shteti të së drejtës dhe me forcimin e dinjitetit institucional e njerëzor.
