Media greke “Protothema” ka publikuar një artikull ku citon deklaratat e ish-deputetes së Demokracisë së Re, Niki Tzavella, lidhur me studimet e kryeministrit shqiptar Edi Rama në Universitetin e Harvardit.
Sipas Tzavellës, Rama ka ndjekur studimet në Harvard falë një burse të financuar nga një fondacion grek, në një kohë kur ai ishte kryetar i Bashkisë së Tiranës. Ajo pohon se në atë periudhë mbante postin e nënkryetares së fondacionit dhe ishte përgjegjëse për përzgjedhjen e kandidatëve nga Evropa Juglindore.
Në një reagim në platformën “X”, ish-deputetja deklaron se ishte vetë ajo që e përzgjodhi Ramën për bursën, duke theksuar se një nga kriteret kryesore ishte përkatësia në minoritete. Sipas saj, Rama e përmbushte këtë kriter për shkak të origjinës greke të nënës së tij. Megjithatë, ajo e cilëson sot këtë vendim si një “gabim”.
Tzavella shprehet se në momentin e përzgjedhjes, Rama nuk kishte profilin publik dhe politik që ka sot dhe se vendimi u bazua në njohuritë e saj për realitetin shqiptar dhe nevojën për përfshirje institucionale.
“30 vjet më parë ai nuk ishte figura që njihet sot. Kishte kualifikimet e nevojshme, ishte kryetar bashkie dhe një nga të paktët kandidatë nga Evropa Juglindore që plotësonte kushtet për një arsimim në Harvard”, citohet të ketë thënë ajo, sipas “Protothema”.
