Tensionet në shtëpinë e “Big Brother VIP Kosova 4” kanë arritur kulmin vetëm pak orë para spektaklit, pas mbërritjes së një zarfi të kuq, i cili ka futur në panik banorët dhe ka nxitur aludime të forta brenda shtëpisë.
Sipas informacioneve të fundit, zarfi misterioz dyshohet se i drejtohet Elijona Binakajt, ndërsa përmbajtja e tij mendohet të lidhet drejtpërdrejt me zhvillime nga jashtë shtëpisë. Kjo ka shtuar edhe më shumë ankthin mes banorëve, të cilët ende nuk e dinë se kush është adresuesi i mesazhit.
Situata vjen vetëm pak ditë pas rrëfimit prekës të Elijonës për jetën e saj personale — një histori që tronditi jo vetëm banorët, por shkaktoi reagime të forta edhe jashtë formatit, përfshirë familjarët e saj.
Burime pranë produksionit bëjnë me dije se arsyeja e zarfit të kuq lidhet me reagimin publik të dajës së Elijonës, i cili ka kundërshtuar versionin e saj, duke ofruar një panoramë krejtësisht tjetër të ngjarjeve. Ky konflikt në distancë mes banores dhe familjarëve duket se ka detyruar Vëllain e Madh të ndërhyjë.
Për momentin, gjithçka mbetet në kuadër të misterit, ndërsa ankthi në shtëpi sa vjen e shtohet. Mbetet për t’u parë nëse Elijona do të përballet me informacionin nga jashtë dhe si do të ndikojë kjo në rrugëtimin e saj, pikërisht në mbrëmjen kur pritet të zbulohen finalistët e këtij edicioni.
