Genova, Itali – Elton Vogli, 37-vjeçari shqiptar i arrestuar të dielën në mbrëmje për plagosjen me thikë të një italiani 40-vjeçar, do të qëndrojë në burg. Ngjarja ndodhi në një apartament në via Stacchetti, në zonën Priaruggia, në lindje të qytetit.
Vogli akuzohet për tentativë vrasjeje dhe grabitje, në bashkëpunim me një 17-vjeçare me origjinë turke. Gjatë seancës për vlerësimin e arrestit, ai zgjodhi të mos i përgjigjej pyetjeve të gjyqtares Martina Tosetti. Sipas kësaj të fundit, ekziston rreziku i arratisjes dhe i përsëritjes së veprës penale.
“Ka treguar se është i pamëshirshëm”, thuhet në urdhrin e masës së sigurisë, ku theksohet edhe fakti se 37-vjeçari dyshohet të jetë mburrur për veprimin e tij përmes një video-mesazhi drejtuar vëllait.
Ishte pikërisht vëllai ai që ndihmoi karabinierët, fillimisht për të shpëtuar 40-vjeçarin – i gjetur në gjendje të rëndë në banesë – dhe më pas për të lokalizuar autorin e dyshuar. Menjëherë pas ngjarjes, Vogli i kishte dërguar mesazhe në WhatsApp: “E vrava, mos eja, jo polici”, duke i dërguar edhe një foto ku shihej një divan i përlyer me gjak.
Vëllai i dorëzoi mesazhet tek karabinierët e San Teodoro dhe u tregoi vendin dhe orën e takimit që kishte lënë me të, në një bar në zonën Lagaccio. Kjo bëri të mundur ndalimin e menjëhershëm të 37-vjeçarit. Një fqinjë e viktimës identifikoi gjithashtu çiftin që u largua nga pallati pas sulmit.
Motivi i ngjarjes mbetet ende i paqartë. Sipas hetimeve paraprake, viktima kishte njohur 17-vjeçaren në një lokal në lagjen Di Negro. Duke qenë se ajo nuk kishte banesë, 40-vjeçari ishte ofruar ta strehojë përkohësisht. Më vonë, vajza kishte kërkuar që në banesë të qëndronte edhe miku i saj shqiptar.
Sulmi ndodhi të dielën në mbrëmje dhe dyshohet se mund të ketë lidhje me përdorimin e lëndëve narkotike, pasi në apartament u gjet një sasi e konsiderueshme crack-u.
Sipas gjyqtares, elementet e deritanishme mbështesin akuzën për tentativë vrasjeje, duke pasur parasysh zonat ku është goditur 40-vjeçari – në kraharor, qafë dhe në kyçin e dorës, plagë kjo që dyshohet të jetë shkaktuar gjatë përpjekjes për t’u mbrojtur.
Viktima iu nënshtrua një ndërhyrjeje të ndërlikuar kirurgjikale dhe aktualisht ndodhet jashtë rrezikut për jetën.
Në momentin e ndalimit në bar, të dy të dyshuarit kishin me vete telefonin e 40-vjeçarit. 17-vjeçarja po ndiqet penalisht në gjendje të lirë. Dyshohet se ajo e ka goditur fillimisht viktimën me një objekt të fortë, ndërsa më pas Vogli e ka sulmuar fizikisht dhe në fund ka përdorur thikën.
Në vitin 2024, 37-vjeçari ishte dënuar për përleshje dhe për mbajtje armësh apo objektesh të rrezikshme.
