Një aksident i rëndë rrugor është regjistruar në orët e para të mëngjesit të sotëm në aksin kombëtar Librazhd–Elbasan. Ngjarja ka ndodhur rreth orës 07:30, në segmentin e njohur si “Kthesa e Murrashit”.
Sipas informacioneve paraprake, mjeti dyshohet se po qarkullonte me shpejtësi. Në përpjekje për të shmangur gurë dhe dhera të rëna në rrugë, drejtuesi ka humbur kontrollin e automjetit. Si pasojë, mjeti është përplasur me barrierat mbrojtëse metalike dhe më pas është përmbysur, duke përfunduar sërish në trupin e rrugës.
Nga aksidenti kanë mbetur të plagosur drejtuesi i mjetit dhe një pasagjer, të cilët janë transportuar me urgjencë në spital për trajtim mjekësor. Automjeti ka pësuar dëme të konsiderueshme materiale.
