Ajo që u paraqit si një lojë brenda Big Brother VIP Albania, u shndërrua në një skenë shqetësuese që ngre pyetje serioze për kufijtë e këtij formati. Sfida e ideuar nga Lori Caffe konsistonte në mbajtjen e këmbëve në një enë të mbushur me ujë dhe akull. Në letër, një provë durimi. Në praktikë, një eksperiment ekstrem mbi trupin e njeriut.
Shumë banorë nuk arritën ta përballonin dhe e ndërprenë sfidën për shkak të dhimbjes dhe pamundësisë fizike. Pesë prej tyre — Brikena, Artan, Mal, Rogert dhe Anxhelo — vendosën të qëndronin deri në fund, duke qëndruar plot 7 orë me këmbët në ujë me akull. Në atë moment, sfida kishte kaluar çdo kufi normal dhe kishte hyrë në territorin e rrezikut serioz shëndetësor.
Pas përfundimit të sfidës, një nga banorët, Artan Kola, pësoi gjakderdhje nga këmbët. Lëkura ishte çarë, dhe dëmtimin mund ta imagjinonim pa problem. Banorët vetë ishin ata që filluan ta komentojnë gjendjen e tij, por ajo që shtoi shqetësimet ishte mënyra si u menaxhua ngjarja brenda shtëpisë: banorët nuk u lejuan ta diskutonin hapur, kamerat u shmangën, dhe kur Stelina tentoi të përmendë gjakderdhjen e Artanit, ndërhyrja ishte e menjëhershme: “kujdes mikrofonin”.
Mbajtja e këmbëve në ujë me akull për një kohë kaq të gjatë sjell pasoja të rënda: ekspozimi ekstrem ndaj të ftohtit ngadalëson qarkullimin e gjakut deri në atë pikë sa indet fillojnë të dëmtohen, duke rritur rrezikun për ngrirje të indeve, dëmtime të nervave periferikë, mpirje të zgjatur, dhimbje kronike dhe humbje ndjeshmërie.
Ky nuk është më vetëm një lojë apo show. Kur shëndeti i njerëzve vihet realisht në rrezik, argëtimi nuk mund të justifikojë dhimbjen, gjakderdhjen apo fshehjen e incidenteve para syve të publikut. Një format televiziv që teston kufijtë e banorëve ka detyrimin minimal të vendosë kufij të qartë, përpara se sfida të kthehet në një situatë që askush nuk duhet ta normalizojë. Kur kamerat fiken dhe mikrofonët “kujdesen”, kujdesi i parë duhet të vijë nga produksioni dhe Top Channel.
