Ministrja e Ekonomisë dhe Inovacionit, Delina Ibrahimaj, deklaroi në Kuvend se ekonomia shqiptare vijon të shënojë rritje të qëndrueshme, e reflektuar si në zgjerimin e sipërmarrjeve ashtu edhe në shtimin e vendeve të punës.
Gjatë fjalës së saj, ajo theksoi se në tremujorin e fundit Prodhimi i Brendshëm Bruto (GDP) u rrit me 3.8%, ndërsa 70% e kësaj rritjeje vjen nga konsumi i popullatës. Sipas saj, konsumi ka vijuar të rritet në mënyrë të qëndrueshme vit pas viti, me norma nga 3.5% deri në 4% që prej vitit 2022.
“Unë di të flas me shifra. Nëse doni shifra, i kam të gjitha përpara”, u shpreh Ibrahimaj, duke theksuar se treguesit ekonomikë flasin për një ekonomi në zgjerim.
Ministrja nënvizoi gjithashtu se është rritur ndjeshëm punësimi dhe numri total i të punësuarve në ekonomi. Sipas saj, kërkesa e lartë për punonjës ka detyruar Shqipërinë të importojë fuqi punëtore nga jashtë, për të përmbushur nevojat e tregut.
Ajo argumentoi se rritja e numrit të bizneseve dhe zgjerimi i aktivitetit ekonomik janë tregues të qartë se ekonomia shqiptare po zhvillohet në mënyrë të qëndrueshme.
