Futbollisti i njohur gjerman, Karim Adeyemi, po shijon disa ditë pushimi në Kosovë, së bashku me partneren e tij, këngëtaren shqiptare nga Ferizaj, Loredana Zefi, dhe disa miq të tyre të ngushtë.
Vizita e tyre vjen menjëherë pas përfundimit të sezonit 2024/25 të Bundesligës gjermane, ku Adeyemi përfaqëson klubin gjigant Borussia Dortmund. Çifti ka zgjedhur të eksplorojë disa nga vendet më të veçanta të Kosovës, duke përfshirë edhe një ndalesë simbolike në memorialin e UÇK-së në Shtërpcë.
Para këtij memoriali, Karim ka bërë shenjën e shqiponjës dykrenare, simbolin e njohur kombëtar të shqiptarëve – një veprim që është pritur me entuziazëm nga ndjekësit dhe mediat sociale.
Loredana dhe Karim janë bashkë prej disa vitesh dhe njihen për përkrahjen e ndërsjellë në karrierat dhe jetën personale. Kujtojmë se Loredana ka një vajzë nga lidhja e mëparshme me reperin shqiptar, Mozzik.
