Themeluesi i Microsoft, Bill Gates, ka deklaruar se ishte një “budallallëk” nga ana e tij që kishte kaluar kohë me Jeffrey Epstein, financieri i dënuar për krime seksuale. Deklarata e tij vjen pas publikimit të gati tre milionë faqeve dokumente që lidhen me çështjen Epstein.
Në një intervistë për 9News Australia, Gates mohoi çdo përfshirje në ndonjë shkelje apo aktivitet të paligjshëm të lidhur me Epstein. Ai hodhi poshtë kategorikisht pretendimet se kishte vizituar ishullin privat të Epstein, ku dyshohet se kanë ndodhur raste abuzimi me të mitur dhe trafikim të qenieve njerëzore.
“Është e vërtetë që kam qenë vetëm në disa darka. Nuk kam shkuar kurrë në ishull dhe nuk kam takuar kurrë ndonjë grua atje,” u shpreh Gates. Ai shtoi se, me kalimin e kohës dhe me daljen në dritë të fakteve të reja, bëhet gjithnjë e më e qartë se takimet e tij me Epstein ishin një gabim, por nuk kishin asnjë lidhje me sjellje kriminale.
Biznesmeni amerikan 70-vjeçar theksoi se pendohet për çdo moment që ka kaluar me Epstein. “Isha budalla që kalova kohë me të. Jam një nga shumë njerëzit që pendohen që e kanë njohur ndonjëherë,” deklaroi ai.
Gates hodhi poshtë gjithashtu akuzat e përfshira në draft-emailet e vitit 2013, të cilat u përfshinë në dokumentet e publikuara së fundmi nga Departamenti Amerikan i Drejtësisë. Sipas tij, një prej emaileve në fjalë nuk ishte dërguar kurrë dhe ishte i rremë. “Epstein ia kishte shkruar vetes. Nuk e di çfarë kishte në mendje,” tha Gates.
Ai shtoi se kjo çështje i kujton vazhdimisht gabimin e bërë dhe se pendohet thellë për çdo kontakt që ka pasur me Epstein.
Së fundmi, Departamenti Amerikan i Drejtësisë publikoi mijëra dokumente lidhur me Epstein, në bazë të Aktit të Transparencës së Dosjeve Epstein, i cili u nënshkrua në ligj nga ish-presidenti Donald Trump më 19 nëntor. Dosjet përfshijnë fotografi të figurave të njohura, transkripte të jurisë së madhe dhe të dhëna hetimore, megjithëse shumë prej tyre janë të redaktuara për të mbrojtur viktimat.
Jeffrey Epstein u gjet i vdekur në qelinë e tij në një burg të New York-ut në vitin 2019, ndërsa priste gjyqin për akuzat e trafikimit seksual. Ai ishte deklaruar fajtor në vitin 2008 në Florida për shfrytëzimin e një të miture për prostitucion, një dënim që është kritikuar gjerësisht si tepër i lehtë
