Sali Berisha u paraqit paraditen e sotme në SPAK në zbatim të masës së sigurisë që lidhet me çështjen “Partizani”. Gjatë një deklarate për mediat, ish-kryeministri bëri të ditur se Prokuroria e Posaçme i ka shtuar dosjes një akuzë të re, e cila sipas tij lidhet me pasuritë e paluajtshme të fëmijëve të tij.
Berisha pretendoi se SPAK ka përfshirë si element akuzues përfitimin e fëmijëve të tij nga procesi i privatizimit të banesave, një proces që, sipas tij, është zhvilluar në përputhje me ligjin dhe nga i cili kanë përfituar mbi një milion qytetarë shqiptarë.
Ai theksoi se pasuritë e familjarëve të tij janë të kufizuara dhe të deklaruara prej vitesh në institucionet përkatëse, duke përfshirë edhe një apartament të privatizuar sipas legjislacionit në fuqi në atë periudhë.
“Fëmijët e mi kanë përfituar sipas ligjit. Vajza ime, për shkak se ishte mbi 18 vjeç, zotëronte një të tretën e apartamentit, ashtu siç parashikonte ligji i privatizimit të banesave. Kjo po paraqitet sot si akuzë për korrupsion nga një prokurori politike. Janë konkluzione që nuk kanë lidhje me faktet dhe janë plotësisht alogjike”, deklaroi Berisha.
