Author: Shqiperia Sot

Vrasja e Ilarias, një vajzë e re shqiptare që jetonte në Itali, ka lënë pas një boshllëk të pashpjegueshëm. Familja e saj është e shkatërruar, ndërsa babai, Flamur Sula, në një intervistë për La Repubblica, shprehet me dhimbje se koha nuk shëron plagë të tilla.

“Sa më shumë kalojnë ditët, aq më shumë më mungon Ilaria. 20 maji ishte ditëlindja e saj. Për ne ishte si një funeral i ri. Ajo nuk do të jetë kurrë më në gjendje të mbushë 23 vjeç.”

Ai ndalet edhe tek ngjarja e fundit në Napoli, ku një vajzë 14-vjeçare, Martina Carbonaro, u vra nga ish-i dashuri. Për Sulën, kjo ishte një plagë e hapur që u ripërjetua sërish:

“Ishte sikur gjithçka të ndodhte nga e para. Si mund të jenë kaq të ftohtë, kaq të egër? Vajzat po vriten kot.”

Në mes të dhimbjes, ai ngre një thirrje për veprim dhe reflektim:

“Qeveria duhet të ndërhyjë. Nuk e di çfarë lexojnë ose studiojnë këta fëmijë, por diçka nuk shkon. Ne mendonim vetëm për punën dhe ndërtimin e jetës. Sot, kemi vetëm frikë.”

Sula rrëfen se ka frikë edhe për djalin e tij 18-vjeçar dhe përpiqet ta udhëzojë për marrëdhëniet dhe respektin ndaj vajzave:

“I them se ‘jo’ do të thotë ‘jo’, dhe nëse dikush përfundon marrëdhënien, duhet ta pranojë.”

Për familjen Sula, normaliteti është shkatërruar. Flamuri mbyll fjalën e tij me një rrëfim të trishtë që përmbledh realitetin e tyre të përditshëm:

“Jeta jonë është kthyer në një rrugë të vetme: nga shtëpia në varreza. Asgjë tjetër.”

Në përpjekje për të përfshirë qytetarët në sigurimin e rendit dhe sigurisë publike, Këshilli i Ministrave miratoi një vendim të ri për organizimin dhe funksionimin e policimit vullnetar.

Çfarë është Policimi Vullnetar?

Policimi vullnetar është një shërbim publik ku qytetarët, pas plotësimit të kritereve të caktuara dhe trajnimit nga Policia e Shtetit, angazhohen në aktivitete mbështetëse për sigurimin e rendit publik.

Kuadri Ligjor dhe Qëllimi

Vendimi synon të forcojë bashkëpunimin midis komunitetit dhe Policisë së Shtetit, duke përmirësuar sigurinë nëpërmjet angazhimit qytetar dhe parandalimit të veprimtarive kriminale.

Detyrat e Policëve Vullnetarë

Patrullime në lagje dhe pranë institucioneve arsimore Menaxhimi i trafikut dhe ndihma në ngjarje publike Mbështetje në situata emergjencash dhe operacione kërkim-shpëtimi Informim dhe ndërgjegjësim i komunitetit për sigurinë Mbledhje informacioni për Policinë e Shtetit Nuk kanë kompetenca për arrestime apo hetime

Kriteret dhe Procedura e Aplikimit

Qytetarët që dëshirojnë të bëhen policë vullnetarë duhet të kenë integritet moral, aftësi fizike dhe një histori të pastër penale. Aplikimi bëhet pranë Drejtorisë Vendore të Policisë dhe përfshin verifikim dokumentacioni dhe trajnim.

Qeveria shqiptare ka miratuar një vendim të rëndësishëm, të propozuar nga Ministria e Mbrojtjes, i cili i mundëson ushtarakëve në rezervë të rikthehen në shërbimin aktiv. Kjo masë vjen për të përforcuar kapacitetet mbrojtëse të vendit dhe për të plotësuar nevojat e Forcave të Armatosura me personel me përvojë dhe specializim.

Sipas vendimit të miratuar nga Këshilli i Ministrave, ish-oficerët, nënoficerët, ushtarët dhe detarët që ndodhen në rezervë, do të kenë mundësinë të rikthehen në shërbim aktiv kur kërkohet ekspertiza e tyre. Aplikimet do të bëhen online, përmes portalit e-Albania, ndërsa Ministria e Mbrojtjes do të publikojë thirrjet për pozicionet e hapura në faqen zyrtare.

Kandidatët e përzgjedhur do t’i nënshtrohen një procesi vlerësimi dhe kontrolli sigurie, dhe do të rikthehen në detyrë duke ruajtur gradën që kanë pasur në momentin e daljes në rezervë. Gjatë periudhës së rikthimit, nuk do të ketë mundësi për avancim në gradë.

Vendimi parashikon gjithashtu që në rast mobilizimi të pjesshëm ose të përgjithshëm, ushtarakët mund të thirren në shërbim pa nevojën e një aplikimi paraprak, me njoftim direkt nga autoritetet.

Ky hap shënon një përmirësim të rëndësishëm në gatishmërinë operacionale të Forcave të Armatosura shqiptare dhe është në përputhje me praktikat e vendeve anëtare të NATO-s. Gjithashtu, ofron një mundësi të re për ish-ushtarakët që dëshirojnë të kontribuojnë sërish në shërbimin e atdheut.

Modelja Sara Gjoka ka qenë së fundmi e ftuar në emisionin “Live From Tirana”, ku ka ndarë detaje interesante nga jeta e saj private – përfshirë flirtet me figura të njohura publike – si dhe ka komentuar për herë të parë sherrin e bujshëm me Xheneta Fetahun, që ndodhi në emisionin “E Diell”.

Përplasja mes dy vajzave nisi pas akuzës së Xhenetës se Sara i kishte shkruar një djali gjatë kohës që ajo ishte në një “njohje” me të. Por sipas Sarës, historia është krejt ndryshe.

“Xheneta tha që ka qenë te pishina me atë djalin dhe i paskam shkruar unë. Por në fakt, përballja me të ka ndodhur në pishinë, sepse më pa me të. Ai më kishte shkruar i pari. Dhe nëse do t’i kisha shkruar unë, çfarë pastaj? S’ka asgjë të keqe,” – u shpreh Sara pa komplekse.

Modelja shtoi se nuk kishte pasur asnjëherë ndonjë shoqëri me Xhenetën, por thjesht një njohje të sipërfaqshme në rrjetet sociale, nga koha kur Xheneta ishte pjesë e “She’s On Top”.

“Jetojmë në një vend të vogël si Tirana, ku shumica njohin njëri-tjetrin. S’jam fallxhore të di me kë flet dikush që më shkruan. Nëse kjo do ishte problem, atëherë Xheneta duhet të ketë folur me 90% të djemve, dhe unë nuk duhet të dal më me askënd,” – ironizoi Sara.

Sipas saj, djali në fjalë e mohoi hapur çdo marrëdhënie me Xhenetën, në prani të njerëzve të tjerë, duke e konsideruar çështjen të mbyllur. Sara e mbylli me një thumb të drejtpërdrejtë:

“Mesa duket disa njerëz jetojnë marrëdhënie imagjinare. Kur dikush e mohon diçka në sy dhe ti sërish kërkon llogari, problemi nuk është më te unë.”

Varianti i ri i COVID-19, “NB”, mbërrin në SHBA – Ekspertët paralajmërojnë për përhapje të shpejtë

Një variant i ri dhe shumë ngjitës i COVID-19, i identifikuar si NB, po ngjall shqetësim të madh në mbarë botën. I njohur për shkallën e lartë të transmetueshmërisë, ky variant ka shkaktuar rritje të ndjeshme të shtrimeve në spitale në Kinë, Hong Kong dhe Azinë Juglindore, dhe tashmë është konfirmuar edhe në Shtetet e Bashkuara të Amerikës.

Sipas Qendrës Amerikane për Kontrollin dhe Parandalimin e Sëmundjeve (CDC), varianti “NB” është zbuluar për herë të parë në fund të marsit dhe fillim të prillit, tek udhëtarët ndërkombëtarë që mbërritën në aeroporte në Kaliforni, Uashington, Virxhinia dhe New York. Më pas janë raportuar raste të izoluara në Ohio, Rhode Island dhe Hawaii.

Edhe pse aktualisht rastet janë të pakta, ekspertët paralajmërojnë se shpejtësia e përhapjes së variantit është shqetësuese, duke kujtuar ritmin me të cilin ai u përhap në pjesë të ndryshme të Azisë.

Në Hong Kong, autoritetet shëndetësore raportojnë një valë të re të infeksioneve, më e larta e regjistruar në më shumë se një vit, çka ngre pikëpyetje serioze për përgatitjen globale ndaj këtij varianti.

CDC dhe organizatat ndërkombëtare shëndetësore janë duke monitoruar nga afër situatën, ndërkohë që u bëhet thirrje qytetarëve të jenë vigjilentë, veçanërisht në udhëtime dhe grumbullime të mëdha.

Zërat për një marrëveshje të madhe qarkullonin prej javësh, dhe tani gjithçka është konfirmuar: Hailey Bieber ka shitur markën e saj të suksesshme të bukurisë, Rhode, te kompania e.l.f. Beauty, në një marrëveshje që kap vlerën e jashtëzakonshme prej 1 miliard dollarësh.

Një shifër mbresëlënëse për një markë të themeluar vetëm në vitin 2022, e cila, falë vizionit dhe ndikimit të Hailey-t në rrjetet sociale, u kthye në një nga emrat më të njohur në industrinë e bukurisë. Produkte si Peptide Lip Tint apo Pocket Blush u bënë virale, duke vendosur trende të reja dhe duke tërhequr një komunitet besnik konsumatorësh.

Në një postim në Instagram, Hailey e konfirmoi lajmin:

“Kur e lançova Rhode, kisha ëndrra të mëdha. Jam krenare që sot bashkohem me një partner që ndan të njëjtin vizion dhe që do ta çojë këtë markë në nivel tjetër.”

Ajo njoftoi se do të vijojë të mbajë një rol aktiv në drejtimin e markës, duke u bërë Drejtoreshë Kreative dhe Drejtore Inovacioni, si dhe këshilluese strategjike për e.l.f. Beauty.

“Ky është vetëm fillimi,” shkroi ajo, duke falënderuar ekipin e Rhode dhe komunitetin që ka mbështetur markën që në ditët e para.

Shitja jo vetëm që shënon një moment historik për Hailey-n si sipërmarrëse, por edhe tregon fuqinë e ndikimit personal dhe strategjisë digjitale në ndërtimin e një perandorie të vërtetë në kohë rekord.

SHBA shpall politikë të re: Ndalim vizash për zyrtarët e huaj që censurojnë amerikanët

Uashington, 28 maj 2025 – Shtetet e Bashkuara të Amerikës kanë shpallur një politikë të re ndalimi vizash, e cila synon të ndëshkojë zyrtarët e huaj – dhe në disa raste edhe familjarët e tyre – për përpjekjet e tyre për të censuruar qytetarët apo banorët amerikanë për përmbajtje të publikuar në platformat amerikane të teknologjisë.

Sekretari Amerikan i Shtetit, Marko Rubio, deklaroi se kjo masë mbrojtëse vjen për të garantuar një nga shtyllat themelore të demokracisë amerikane: lirinë e shprehjes.

“Është e papranueshme që zyrtarë të huaj të kërcënojnë me urdhër-arreste apo të ushtrojnë presion ndaj shtetasve apo banorëve amerikanë për përmbajtje të shpërndarë në rrjetet sociale, ndërkohë që këta ndodhen brenda territorit amerikan”, thuhet në deklaratën e Rubio-s.

Po ashtu, ai theksoi se është po aq shqetësuese që përfaqësues të qeverive të huaja po tentojnë të imponojnë politika të censurës mbi platformat teknologjike amerikane, duke tejkaluar juridiksionin e tyre dhe duke ndërhyrë në ligjet dhe sovranitetin e SHBA-së.

Politika e re mbështetet në Seksionin 212(a)(3)(C) të Aktit të Imigracionit dhe Shtetësisë, i cili i jep Sekretarit të Shtetit kompetencën për të shpallur të papranueshëm çdo të huaj, nëse hyrja e tij mund të ketë pasoja serioze për politikën e jashtme të Shteteve të Bashkuara.

Masa do të mund të zgjerohet edhe për anëtarët e afërt të familjes së personave të përfshirë në këto veprime censuruese.

Kjo lëvizje vjen në një kohë kur Uashingtoni është gjithnjë e më i shqetësuar për përpjekjet e huaja për të ndikuar ose frikësuar qytetarët amerikanë, përmes presioneve të jashtme që lidhen me lirinë e shprehjes në platformat sociale si X, Meta, YouTube dhe të tjera.