Kryeministri Edi Rama ka bërë të ditur se, përveç kampusit universitar në Tiranë, do të ndërtohet edhe një kampus i ri në Durrës, i cili do të shërbejë edhe për strehimin e studentëve që studiojnë në kryeqytet.
Gjatë një takimi me rektorët e universiteteve, kreu i qeverisë u shpreh se ky projekt synon të lehtësojë një nga problemet kryesore me të cilat përballen studentët, atë të qirave të larta në Tiranë. Sipas Ramës, ndërtimi i rezidencave studentore në Durrës do të krijojë alternativa më të përballueshme për akomodimin.
Ai theksoi gjithashtu se lëvizja e studentëve mes dy qyteteve do të jetë më e thjeshtë, pasi pritet që së shpejti të vihet në funksion treni që lidh Tiranën me Durrësin.
“Kemi dy kampuse: kampusin e Tiranës dhe kemi hapur procesin për kampusin e Universitetit ‘Aleksandër Moisiu’. Ekziston potenciali për të krijuar një infrastrukturë të qëndrueshme rezidencash studentore. Me vënien në funksion të trenit, do të jetë e lehtë që studentët e Tiranës të strehohen në Durrës. Do të ndërtojmë një kompleks studentor cilësor për të ndihmuar në zgjidhjen e problemit të madh të qirave të larta”, u shpreh Rama.
Sipas kryeministrit, arsimi i lartë ndodhet në një fazë të re zhvillimi, me më shumë eksperiencë dhe qartësi në funksionimin e universiteteve.
