Ish-banorja e Big Brother VIP Kosova, Vesa Vllasaliu, ka bërë një paraqitje që s’mund të kalonte pa u vënë re – dhe këtë herë, nuk ka të bëjë me modën.
Pak para ndeshjes së shumëpritur Shqipëri–Serbi në stadiumin “Air Albania”, Vesa ka publikuar në rrjete sociale një foto ku shfaqet e buzëqeshur, e veshur me fanellën kuqezi – dhe jo çfarëdo fanelle, por atë me numrin 19, që i përket futbollistit të kombëtares, Mirlind Daku.
Ky detaj ka ndezur menjëherë rrjetin, me komentues që aludojnë se kjo nuk është një zgjedhje rastësore, por një sinjal i qartë për një lidhje që s’po fshihet më. Thashethemet për një romancë mes Vesës dhe sulmuesit të njohur kanë qarkulluar prej muajsh, por asnjëherë nuk janë konfirmuar zyrtarisht nga të dy.
Por tani, duket se heshtja po zëvendësohet me gjeste publike. Fansat kanë shpërthyer në komente – nga ata që i urojnë si çift, tek ata që mezi presin një konfirmim zyrtar.
A është ky postimi që “zbulon” lidhjen? Apo thjesht një përkrahje si tifoze? Çfarëdo qoftë, një gjë është e sigurt: Vesa dhe fanella me numrin 19 janë bërë tema e ditës.
