Këngëtari i grupit të njohur rock “3 Doors Down”, Brad Arnold, ka ndërruar jetë të shtunën (7 shkurt), në moshën 47-vjeçare.
Lajmi u konfirmua nga përfaqësuesit e tij, të cilët bënë të ditur se Arnold vdiq paqësisht në gjumë, pas një beteje me kancerin e veshkave. Sipas njoftimit zyrtar, ai ishte i rrethuar nga bashkëshortja e tij Jennifer dhe familja, ndërsa anëtarët e grupit u shprehën të shkatërruar nga humbja.
Pak kohë më parë, Arnold kishte shkruar në rrjetet sociale: “I shërbejmë një Zoti të gjithëfuqishëm, i cili mund të kapërcejë gjithçka. Prandaj nuk kam frikë. Me të vërtetë, sinqerisht, nuk kam aspak frikë”.
Në një postim në Facebook, anëtarët e “3 Doors Down” e përshkruan Arnoldin si një figurë kyçe në historinë e grupit: “Si anëtar themelues, këngëtar dhe baterist i parë i 3 Doors Down, Brad ndihmoi në ripërcaktimin e rock-ut mainstream, duke kombinuar stilin post-grunge me këngë emocionalisht të drejtpërdrejta dhe tekste që preknin përvojat e përditshme të dëgjuesve”.
Tingujt dhe këngët e Bradit u bënë një pikë referimi kulturore për një brez të tërë, duke krijuar disa nga hitet më të qëndrueshme të viteve 2000”, shtuan ata. “Muzika e tij shkoi përtej skenës, duke krijuar momente lidhjeje, gëzimi, besimi dhe përvojash të përbashkëta që do të jetojnë gjatë, shumë pas shfaqjeve ku ai performoi”.
